विश्वकपमा चमत्कार गर्ने टोलीहरू: इतिहासका पाँच ठूला उलटफेर

काठमाडौं। सन् २०२६ को फिफा विश्वकपको सोमबार सम्पन्न नकआउट चरणले विश्वकप इतिहासकै सबैभन्दा ठूला उलटफेरमध्ये अर्को नयाँ कीर्तिमान थपेको छ।

उपाधि दाबेदार जर्मनीलाई राउन्ड अफ ३२ चरणमै पाराग्वेले पेनाल्टी सुटआउटमा पराजित गर्दै प्रतियोगिताबाट बाहिर पठाएपछि यो विश्वकप झन् रोमाञ्चक बनेको छ।

समूह चरणमै धेरै नाटकीय नतिजा देखिएको यस विश्वकपमा नकआउट चरणको यो परिणामलाई इतिहासकै सबैभन्दा ठूलो आश्चर्यजनक जितमध्ये एक मानिएको छ। विश्वकप नकआउट चरणका पाँच ऐतिहासिक उलटफेर यसप्रकार छन्

१. जर्मनीविरुद्ध पाराग्वे (२०२६)

पाराग्वेका जोसे क्यानालेले विश्वकप इतिहासमा आफ्नो नाम स्वर्ण अक्षरले लेखाए। चार पटकको विश्वविजेता जर्मनीलाई अन्तिम ३२ चरणमा पेनाल्टी सुटआउटमा ४–३ ले पराजित गर्दै पाराग्वेले विश्व फुटबललाई स्तब्ध बनायो।

प्रतियोगिताको पहिलो खेलमा अमेरिकासँग फराकिलो हार बेहोरेपछि पाराग्वेको यात्रा समूह चरणमै टुंगिने धेरैको अनुमान थियो। तर टोलीले त्यस हारलाई प्रेरणामा बदल्दै जर्मनीलाई बाहिर निकालेर विश्वकप नकआउट इतिहासकै सबैभन्दा ठूलो उलटफेर रच्यो।

२. जर्मनीविरुद्ध बुल्गेरिया (१९९४)

जर्मनी यसअघि पनि ठूलो उलटफेरको शिकार बनेको थियो। अमेरिकामा आयोजित सन् १९९४ को विश्वकपको क्वाटरफाइनलमा पहिलोपटक विश्वकपमा आमनेसामने भएका जर्मनी र बुल्गेरियाबीच बुल्गेरियाले २–१ को पुनरागमन जित निकाल्दै तत्कालीन साविक विजेतालाई प्रतियोगिताबाट बाहिर पठाएको थियो। त्यो नतिजा आज पनि विश्वकप इतिहासका सबैभन्दा ठूलो आश्चर्यजनक नतिजामध्ये एक मानिन्छ।

३. इटालीविरुद्ध दक्षिण कोरिया (२००२)

सन् २००२ को विश्वकपमा सह–आयोजक दक्षिण कोरियाले अन्तिम १६ चरणमा इटालीलाई ‘गोल्डेन गोल’ मार्फत २–१ ले हराएको थियो।

क्रिस्टियन भिएरीको गोलबाट इटालीले अग्रता लिए पनि सोल कि–ह्युनले अन्तिम समयमा बराबरी गोल फर्काए। त्यसपछि आन जुङ–ह्वानले अतिरिक्त समयमा गोल्डेन गोल गर्दै दक्षिण कोरियालाई ऐतिहासिक जित दिलाए। उक्त विश्वकपमा दक्षिण कोरिया चौथो स्थानमा पुगेको थियो, जुन आजसम्मकै उसको उत्कृष्ट प्रदर्शन हो।

४. ब्राजिलविरुद्ध जर्मनी (२०१४)

सन् २०१४ को विश्वकपको सेमिफाइनलमा जर्मनीले आयोजक ब्राजिललाई ७–१ को लज्जास्पद हार चखाएको थियो।

जर्मनीका पाँच फरक खेलाडीले गोल गरेका थिए भने ब्राजिलका लागि ओस्कारले खेलको अन्तिम समयमा सान्त्वना गोल फर्काएका थिए।

आफ्नै घरेलु मैदानमा यस्तो हार बेहोरेपछि ब्राजिलका प्रशिक्षक लुइज फेलिपे स्कोलारीले त्यस दिनलाई आफ्नो जीवनकै ‘सबैभन्दा खराब दिन’ भनेका थिए। जर्मनीले त्यसपछि फाइनल जित्दै चौथो पटक विश्वकप उपाधि उचालेको थियो।

५. मोरक्कोविरुद्ध पोर्चुगल (२०२२)

मोरक्को युरोपेली टोलीहरूविरुद्ध ऐतिहासिक उलटफेर गर्न परिचित टोली हो। कतारमा आयोजित सन् २०२२ को विश्वकपको क्वार्टरफाइनलमा मोरक्कोले क्रिस्टियानो रोनाल्डो नेतृत्वको पोर्चुगललाई १–० ले पराजित गरेको थियो।

खेलको अन्तिम समयमा १० खेलाडीमा सीमित भए पनि मोरक्कोले अग्रता जोगायो र इतिहास रच्दै विश्वकपको सेमिफाइनल पुग्ने पहिलो अफ्रिकी तथा पहिलो अरब राष्ट्र बन्यो।