टिमुरे–स्याफ्रुबेँसीमा शव व्यवस्थापनमै संकट : गन्हाउन थालेपछि हेलिकप्टरले बोक्न मानेन, ‘बकेट’ खोजिँदै

शव व्यवस्थापनमा समस्या, सुरक्षित राख्न ‘बकेट’ खोजिँदै

रसुवा । भोटेकोशी नदीमा आएको बाढीपछि रसुवाको टिमुरे र स्याफ्रुबेँसी क्षेत्रमा उद्धार तथा शव व्यवस्थापनमा थप चुनौती देखिएको छ। बाढीपछि फेला परेको एक शव गन्हाउन थालेपछि त्यसलाई घटनास्थलबाट अन्यत्र लैजानसमेत समस्या भएको हो।

शवलाई सुरक्षित स्थानमा लैजान निजी हेलिकप्टरको प्रयोग गर्ने प्रयास गरिएको थियो। तर शव गन्हाउन थालेपछि निजी हेलिकप्टरले त्यसलाई बोक्न अस्वीकार गरेको जनाइएको छ।

शव लामो समयसम्म घटनास्थलमै राख्नुपर्ने अवस्था आएपछि त्यसलाई सुरक्षित राख्न आवश्यक सामग्रीको खोजी भइरहेको छ। तत्कालका लागि शव राख्न ‘बकेट’ अर्थात् उपयुक्त कन्टेनरको व्यवस्था गर्न माग गरिएको बताइएको छ।

भोटेकोशीमा आएको बाढीले टिमुरे, स्याफ्रुबेँसीलगायत क्षेत्रमा ठूलो क्षति पुर्‍याएपछि उद्धार तथा खोजी कार्य चुनौतीपूर्ण बनेको छ। बाढीका कारण प्रभावित क्षेत्रमा आवागमन र उद्धार सामग्री व्यवस्थापनमा समेत कठिनाइ भइरहेको छ।

शवको उचित व्यवस्थापनका लागि सम्बन्धित निकायबीच समन्वय भइरहेको बताइएको छ। घटनास्थलमा उद्धार तथा खोजी कार्यसँगै बेपत्ता तथा मृतकको पहिचान र शव व्यवस्थापनको काम पनि अघि बढाउनुपर्ने अवस्था छ।